بلبنان… حلو

بلبنان حلو الإنفتاح، الإنفتاح على تقبل الآخر… شو مفكرين إنّا هينة نكون ١٨ طايفة على أرض وحدة؟ هوي إذا كنا تنين من طايفتين بنفس المطرح بتطّوف الجلسة بالنسنسة والجقورة.
بلبنان حلو التطور، التطور يللي بخليك تتصل أكتر من ١٠ مرات بالسنكري حتى تقلو يجي يصلحك القسطل بالحمام…. وبالآخر عَ كترة التلفونات يللي بتعملا بتستحي وبتحس حالك غلط، ومن بعد تالت مرة بيسير يقطع الخط إنتَ وعم تعتذر منو عن المرة يللي قبلا…
بلبنان حلوة السياحة والسواح يللي بحبونا على كرمنا وحسن ضيافتنا… ما هوي من وصلتو على المطار السايح وإذا كانت لون بشرتو غامقة شوي منبلش نجقور في… وما بيلحق يوصل لخارج مبنى المطار بيكون تمنى شي ١٠٠ مرة إنو يا ريت ما سمع من زميلو اللبناني بالشغل يللي ناقرلو راسو عن لبنان وعن شعبو المحب والمضياف.
بلبنان حلوة الثقافة، ثقافة المسبات والتلطيشات يللي بتاكلا إختي وإختك كل مرة نزلت وبتنزل فيا عالدكان تحت البيت.
بلبنان حلو إنو منهتم بالبيئة، بشرفكن قليلة إنو نحنا كل يوم منقعد ١٢ ساعة من دون كهربا بس كرمال نحافظ على البيئة من الإنبعاثات السامة… وبيربحونا جميلة ببلاد برا إنو بيطفوا الضو نهار واحد بالسنة. بلبنان حلو البحر، بحرو يللي بس تغطس في ما فيك تشوف إلا كياس زبالة عم تسبح رفوف معك وسمكاتو هجروا تتاخد محلن قناني البلاستيك والحفاضات.
بلبنان حلوة الجبال، جبال الزبالة يللي بتعلا فوق البحر ويللي مع أول موجة بتهدر في… ما هوي اللبنانية قد ما عاملين منيح صارت الزبالة بتعرف طريقا لوحدا.
الحلو بلبنان إنو لكل شي صار فيك تاخد قرض… ما قد ما صار الشعب اللبناني مقروض صار ياخد قرض حتى يدفع يللي قارضو قبل.
بالأملية إذا كل يللي قريتوا قبل حسيتوا حلو بحقنا… بعتقد صار لازم تعيدوا النظر بمفهومكن للحلو.

ميلاد عيسى

This entry was posted in Weekly Supplement and tagged , , , , , , , , , , . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s